बलात्कारीलाई फाँसी दिन सकिन्न कानुन संशोधन गर्न अखिल क्रान्तिकारीको माग

प्रधानमन्त्रीले भने(बलात्कारीलाई फाँसी दिन सकिन्न कानुन संशोधन गर्न अखिल क्रान्तिकारीको माग
२७ फागुन, काठमाडौं । बलात्कारीलाई फाँसीको सजाय दिने कानुन बनाउन माग बढिरहेकोबेला प्रधानमन्त्री सुशील कोइरालाले तत्काल त्यो सम्भव नहुने बताएका छन् । उनले फाँसीको सजाय नदिने अन्तराष्ट्रिय कानुनमा नेपालले हस्ताक्षर गरेकोले तत्काल असम्भव हुने बताए ।
बुधबार विहान एमाओवादीको विद्यार्थी संगठन अखिल क्रान्तिकारीको ज्ञापन पत्र बुझ्दै प्रधानमन्त्री कोइरालाले बलात्कारीलाई हालकै कानुनमा व्यवस्था भएअनुसार हदैसम्मको कारवाही गर्ने प्रतिबद्धता जनाए ।
‘हामीले नयाँ कानुन बनाऊ र बलात्कारीलाई फाँसी देऊ भन्यौं,’ ज्ञापनपत्र बुझाउन बालुवाटार पुगेका अखिल क्रान्तिकारीका अध्यक्ष रमेश मल्लले अनलाइनखबरसँग भने, ‘प्रधानमन्त्री जीले अहिले सम्भव छैन, यसको लागि सदनको सहारा लिनुपर्छ र दलहरुसँग पनि छलफल गर्नुपर्छ भन्नुभयो ।’
बाराकी नाबालिका पुजा साह लगायतलाई बलात्कार गरी हत्या गर्नेहरुलाई फाँसीको सजायको व्यवस्था गर्न चौतर्फी आवाज उठिरहेको छ ।
क्रान्तिकारीका अध्यक्ष मल्लले सदनमा नयाँ कानुनको प्रस्ताव लैजान आफूहरुले आग्रह गरेको र दलीय सहमति जुटाउन आफूहरुले पनि पहल गर्ने बचन दिएको अनलाइनखबरलाई बताए ।